Baguette & Baguette تحتفل بـ30 سنة من الثقة والمحبة

نهار 19 جوان 2026، احتفلت ‎Baguette & Baguette‎ بمرور 30 سنة على انطلاقها، من خلال مبادرة استثنائية: رجّعنا السندويتش الأسطوري متاعنا "‎Fermier‎" للسعر الأصلي متاعو سنة 1996، يعني بـ 1.4 دينار فقط.

التحدّي كان واضح: نقدّمو نفس السندويتش اللي يعرفوه ويحبوّه التوانسة، سخون وطازج، وبنفس الجودة اللي تعوّدوا بيها من ‎Baguette & Baguette‎. خبز خارج توّه من الفور، وإسكالوب طازج يتحضّر بالوقت.

كنا نعرفو اللي التوانسة يحبّو Baguette & Baguette‎ وعندهم ارتباط كبير بيها، أما بصراحة ما كنّاش متوقعين كل هالمحبّة وكل هالإقبال.

ملي بدا العرض، تكونت طوابير قدّام مطاعمنا في كامل أنحاء الجمهورية. الإقبال فاق كل التوقعات. وفي أقل من ساعتين، تمّ تقديم أكثر من 20 ألف سندويتش، الكلّهم تحضّروا في الحين وبنفس معايير الجودة اللي نلتزمو بيها ديما.

النجاح هذا ما كانش ينجّم يصير كان بفضل المجهود الكبير اللي قاموا بيه أعواننا، ومزوّدينا، وشركائنا الكل. ورغم الاستعدادات الضخمة اللي قمنا بيها، بعض المطاعم نفد مخزونها في وقت قياسي بسبب كثافة الطلب.

للناس اللي ما نجموش يتمتعوا بالعرض، نقدّمولهم اعتذارنا الصادق، ونشكرهم على تفهّمهم وصبرهم. نعرفو اللي برشة منكم جاو مخصوص باش يعيشوا اللحظة هاذي، وكنّا نتمنّاو نلبّيو طلب كل شخص جا يشاركنا الفرحة.

أما أكثر من مجرد عرض ترويجي، النهار هذا باش يبقى محفور في تاريخ ‎ Baguette & Baguette‎. ذكّرنا بالسبب اللي خلّانا نواصلو 30 سنة كاملة: جمع الناس حول منتوجات أصيلة تتحضّر بشغف، وبحرص كبير على الجودة.

شفنا عائلات كاملة، طلبة، أولياء وأطفال واقفين في الصف مع بعضهم، باش يرجعوا يتذوقوا طعم سندويتش رافق ذكرياتهم على امتداد عقود. سمعنا قصص، وذكريات، وحكايات وفاء أثّرت فينا برشة.

أكثر من ألف متعاون ومتعاملة تجنّدوا خلال الأيام اللي سبقت المناسبة باش يحضّروا لهذا الحدث ويخلّيوه يخرج في أحسن صورة. من المطاعم لمراكز الإنتاج، للوجستيك، للمشتريات، للصيانة، ولكل المصالح المساندة، الناس الكل أعطاو أقصى ما عندهم.

واليوم، هم فخورين، متأثرين، وسعداء بالنجاح الكبير اللي حققناه مع بعضنا.

منذ سنة 1996، وعدنا ما تبدّلش: نقدّمو منتوجات ذات جودة عالية، تتحضّر بعناية، وتحترم أعلى معايير النظافة، والسلامة الغذائية، و فرشكة.

النجاح الاستثنائي اللي عشناه في النهار هذا زاد قوّالنا العزيمة باش نواصلو نطوّرو، ونفاجئوكم، ونكونو ديما قدّ الثقة اللي منحتوهالنا.

لكل شخص شاركنا هالنهار التاريخي: شكراً.

ولكل شخص رافقنا طوال 30 سنة: شكراً.

وباسم أكثر من 1000 متعاون ومتعاونة في ‎ Baguette & Baguette‎:
1000 مرة شكراً على وفائكم.
1000 مرة شكراً على ثقتكم.
1000 مرة شكراً على محبتكم.